माझी मी-अशी मी

मंगेश पाडगावकर ह्यांच्या पत्नी यशोदा पाडगावकर ह्यांनी लिहिलेलं आत्मचरित्र “कुणास्तव कुणीतरी”. 

कलावंताचा संसार सांभाळणं म्हणजे तारेवरची कसरत असं कोणीसं म्हटलंय ते काही खोटं नाही. समाजात अतिशय प्रतिष्ठा मिळवणारा, लोकांच्या गळ्यातला ताईत असलेला नवरा असणं…… हे जरी अप्रूप असलं तरी……. त्याचा संसार सांभळणं तितकंच कठीण. ह्याचा प्रत्यय प्रत्येक यशस्वी नव-याच्या बायकोने लिहिलेल्या पुस्तकातून दिसतो. तसंच या ही पुस्तकातून जाणवतं.

कवितेच्या दुनियेत रमलेल्या, वास्तवाची अगदीच जाणीव नसलेल्या आपल्या नव-याचा, त्याच्या सगळ्या सवयींचा होणारा जाच अगदी प्रेमाने सहन करणारी यशोदा……..!! वेगळ्याच धर्मातून आल्यामुळे लग्नाला माहेरचाच प्रचंड विरोध…… आणि सासरी आपला स्वीकार अगदी सहज झाल्यामुळे आलेलं उपकाराचं ओझं सांभाळता सांभाळता तिची अगदी ससेहोलपट होते. कायम पैशाची ओढाताण, नाजुक तब्येत, त्यामुळे होणारी ससेहोलपट….. सगळं जिवंत लिखाण. एका सर्वसामान्य संसारी स्त्री ची, संसाराची गाडी रुळावर ठेवण्यासाठी एकटीची होणारी तगमग, धडपड….. अगदी मनाला भिडते. 

त्यांचं लिखाण फार प्रामाणिक वाटतं. त्यांना त्यांच्या मर्यादांची असलेली जाणीव, काहीतरी करुन दाखवायची जिद्द, एकटीच्या हिंमतीवर सगळे कठीण प्रसंग निभावून नेणारी विचारसरणी…….सगळंच कौतुकास्पद वाटतं.

पुन्हा एकदा…….प्रत्येक यशस्वी पुरुषाच्या मागे उभ्या असण्या-या प्रचंड स्त्री शक्तीची जाणीव करुन देणारं पुस्तक !!