Feeds:
नोंदी
प्रतिक्रिया

Archive for the ‘रोजचं पण नवीन’ Category

Read Full Post »

इतकी मस्त थंडी पडलीये ना….सकाळी एकदम फ्रेश वाटतं फिरताना. कान, पाय आणि छाती ह्यांची काळजी घेतली की मग कितीही थंडी असली तरी बाहेर पडता येतं.

नुकतीच एका आज्जींशी ओळख झालीये. खरं तर बागेत इतके लोक असतात. पण ह्या आज्जी खास आहेत. रोज अगदी छान तयार होऊन येतात. सुरेख साड्या आणि खूप छान नेसतात सुद्धा. प्रसन्न हसरा चेहेरा 😊

रोज मी बघायचे. एक दिवस मात्र रहावलंच नाही. त्यांना म्हटलं… “तुमच्या साड्या फार सुरेख असतात आणि तुम्ही नेसता पण खूप छान” तर खुश होऊन प्रसन्न हसत म्हणाल्या… Thank u 😁. आता रोज “Good Morning” ची देवाणघेवाण. मग हळुहळु आणखी दोन चार वाक्यं. मी दोन दिवस गेले नाही तर आज म्हणाल्या….”दोन दिवस दिसला नाहीत.” गंमत वाटली. मनात विचार आला…. कोण कुठल्या आज्जी… काही दिवसांची ओळख…ओळख काय…काही जुजबी वाक्यांची बोलचाल. पण त्यांना आवर्जून विचारावंसं वाटलं.

आपण सगळेच शोधत असतो ना असंच कुणाला तरी… अनोळखी माणसांमधे सुद्धा कोणी तरी आपलं भेटतंच !!आणि हा आहे… झाडांच्या आडूनही आपलं अस्तित्व दाखवणारा…. टाकाऊ वस्तू वापरून तयार केलेला बागेतला बाप्पा … !! हा आहे साक्षीदार आम्हा सगळ्यांच्या भेटीगाठींचा 😊 

49464968_2055456881181382_6017211678041571328_o

Read Full Post »

जरासं उजाडायला लागलं की सुरु होते किलबिल… पाखरांची … माणसांची !! वातावरणात हळूहळू जिवंतपणा यायला लागतो. आपापल्या वेळेप्रमाणे पावलं बागेच्या दिशेने वळायला लागतात. आम्ही ज्या बागेत फिरायला जातो ती बाग म्हणजे तर नुसतं चैतन्य ! कुणाचं धावणं, कुणाचं चालणं, कुणाची योगासनं तर कुणाचं हसणं ! कुणाचं बॅडमिंटन तर कुणाचं नाचणं. प्रत्येकाची लय ठरलेली… आणि जागासुध्दा ! आपली जाण्याची वेळ बदलली की भेटणारे लोक बदलतात. चालताना नकळत चेहे-यावर हास्य उमटतं… समोरुन प्रतिसाद आला की ते रुंदावतं 😊 आजकाल बागेत जिमींग पण करता येतं. ग्रीन जिम म्हणतात त्याला. निसर्गाच्या सान्निध्यात व्यायाम. इतकं छान वाटतं ना… ! लुगडं नेसलेल्या आज्जींना त्यावर व्यायाम करताना बघून गंमत वाटते… आणि कौतुकही. तरुणाई चिवचिवत असते तर वयस्क मंडळी चालून झालं की मस्त गप्पा करत बसलेले दिसतात. निवांतपणा तर नागपुरचा ट्रेडमार्क आहे. कुणालाच कशाचीच घाई नसते 😉

प्रत्येक चौथ-यावर काहीतरी वेगळंच सुरु असतं. पेपरवाचन, नृत्याचे धडे, योगा, गप्पा. सगळं आटोपलं की बागेबाहेर शहाळं आणि हर्बल ज्युसचं पौष्टिक पेयपान.

सगळी बाग माणसांनी फुललेली… बहरलेली. निःशब्द रात्रीनंतर ही बाग आतुरतेनं पहाटेची वाट बघत असेल आणि मग कौतुकानं मिरवत असेल सकाळचं अस्सल लेकुरवाळंपण !

आम्ही पण आता या सोहळ्यात रोज सामिल होतो आणि आमच्या दिवसाच्या मैफिलीची सुरवात करतो 😊

Read Full Post »

%d bloggers like this: