“भाई- व्यक्ती की वल्ली” सिनेमा बघून बाहेर निघताना मनात संमिश्र भावना होत्या. पुलं बघितल्याचं समाधान काही पूर्ण मिळालं नाही. काहीतरी राहून जातंय असं वाटत राहिलं. तुटक तुटक वाटत राहिलं. पण पुलं च्या आयुष्यात डोकावल्याचा आनंद मात्र निश्चितच मिळाला त्याबद्दल मांजरेकरांचे आभार 😊🙏.
पुलं, सुनीताबाई म्हणजे श्रद्धास्थानं … !! जवळपास सगळ्यांनीच पुलं म्हणजे कोण हे वाचलंय… अनुभवलंय. त्यामुळे त्या प्रत्येकाच्या मनातले ‘ते’ पुलं पडद्यावर दाखवायचे म्हणजेच एक मोठं दिव्य होतं. काही गोष्टी छान जमल्या आहेत पण काही मुळीच पटल्या नाहीत.
पुलं म्हणून सागर देशमुख आवडलाच. पुलं अगदी अस्सेच असतील असं मनापासून वाटलं. इरावती हर्षे सुद्धा आवडेश. वृद्ध सुनीताबाई म्हणून शुभांगी दामले तर अफाटच ! मुण्मयी देशपांडे फक्त 3-4 सीन मधेही लक्षात राहते. माझी आवडती वीणा जामकर केवळ काही सेकंद दिसते…. पण असे काही एक्सप्रेशन्स देते की डोळ्यात पाणीच तरळतं. पुलं च्या आई म्हणून अश्विनी गिरीचं काम छानच. सचिन खेडकरचे बाबा पण जबरदस्त. कुमार गंधर्व परफेक्ट. अजय पूरकर मात्र भीमसेन जोशी अजिबातच वाटत नाही. चंपूताईंच्या घरची मैफिल कमाल झालीये…!!
माझ्यासोबत माझी लेक होती. त्यांच्या पिढीने पुलं वाचले नाहीत पण कथाकथनातून ऐकले आहेत. त्यांना हा सिनेमा बघून पुलंबद्दल आपल्याइतकी आपुलकी वाटेल का….हा प्रश्न राहून राहून मनात येत होता.
सिनेमात पुलं लिहायला कधी आणि कसे लागलेत वगैरे काहीच समजत नाही. जे खूप महत्वाचं होतं. त्यांचं त्यांच्या आईसमोरही बिनदिक्कत सिगारेट पिणं… असं खरंच असेल ??
आता पुढच्या भागात काय काय दाखवणार ह्याची प्रचंड उत्सुकता आहे. “महेश मांजरकर, परिक्षेत पास तर नक्की झालात… पण मार्क्स मात्र फार काही खास नाहीत हो… सॉरी !!
(पुलं आणि सुनिताबाई ह्यांची चाहती)
जयश्री अंबासकर
